Ágætu félagar!
Nú hafa verið sendir út reikningar vegna árgjalda og kynningargjalda fyrir árið 2018. Þeir ættu að hafa borist öllum í pósti ásamt fréttabréfi. Í því er rakið það helsta sem varðar starfsemi samtakanna um þessar mundir. Endilega kynnið ykkur það og stjórn treystir á skilvísar greiðslur. Hvað varðar nýja útgáfu af Íslandskortinu þá er enn verið að dreifa birgðum úr prentun síðasta hausts. Stefnt er á endurnýjun síðsumars.
Með sumarkveðju frá stjórn.
Ágætu félagar í Samtökum um söguferðaþjónustu! Loksins er nýja kynningarefnið okkar á prenti komið út. Íslandskort samtakanna sem sýnir yfir 40 staði vítt og breitt um landið og hvetur fólk til að kynna sér söguferðaþjónustu enn frekar gegnum heimasíðunar http://www.sagatrail.is. R3-dreifing mun sjá um að skipta kortunum út fyrir bæklingana okkar í hilluplássum næstu vikurnar. Og þeir sem fá ekki heimsókn frá þeim geta nálgast kort til að hafa hjá sér á næstu upplýsingamiðstöð. Kortinu er ætlað að lifa út árið 2018 og á því ekki að koma að sök þó að útgáfan sé seint á ferðinni, þó að vissulega hefði verið betra að koma þessu út í sumar. Stjórn biðst afsökunar á því en ýmsar annir, eins og undirbúningur víkinga-námsstefnunnar í Follow the Vikings, færðu tímaplön úr skorðum. En fyrir vikið komust einnig fleiri inn í kynningarefnið en upphaflega var útlit fyrir. Greiðsluseðlar fyrir kynningargjöldum til þeirra sem ekki höfðu þegar greitt munu berast á næstunni.
Ágætu félagar í Samtökum um söguferðaþjónustu!
Stjórn hefur ákveðið að boða aftur til fræðsluferðar um Austurland og halda aðalfund samtakanna samhliða henni á Djúpavogi 1. apríl. Fræðsluferðin byrjar að kvöldi fimmtudagsins 30. mars og teygir sig um Hérað og Firði allt til Djúpavogs. Haldin verða erindi og heimsóttir áhugaverðir sögustaðir og sýningar. Flugfélag Íslands veitir afslátt á flugi svo að ferð fram og til baka RVK-EGS-RVK er kr. 26.725. Þátttökugjald er kr. 12.000 fyrir þá sem eru með fulla aðild að SSF eða einstaklingsaðild en 24.000 kr. fyrir þá sem eru með aukaaðild eða utan félags. Innifalið í þátttökugjaldi er rútuferðir, máltíðir og aðgangseyrir. Boðið er upp á hagstæða gistingu í Óbyggðasetrinu í Fljótsdal og á Hótel Framtíð Djúpavogi. Dagskrá og aðrar upplýsingar er að finna í pdf-skjali sem er hægt að sækja hér. SKRÁNINGARFRESTUR ER TIL 1. MARS. Skráningar berist til Skúla Björns á netfang: skuli@skriduklaustur.is
Ragnheiður Elín Árnadóttir iðnaðar- og viðskiptaráðherra og Rögnvaldur Guðmundsson formaður Samtaka um söguferðaþjónustu (SSF) skrifuðu 25. febrúar undir samning um eflingu söguferðaþjónustu á Íslandi. Markmið samningsins er að vinna að frekari uppbyggingu og þróun söguferðaþjónustu um land allt þar sem leitast verður við að auka upplifun ferðamanna og afþreyingu sem byggir á menningararfi.
Áhersla er lögð á að byggja upp ferðaþjónustu sem lýtur að miðlun menningararfs og kynningu á sögu þjóðarinnar. Kannanir sýna að áhugi ferðamanna beinist í auknum mæli að þessum þætti sem getur orðið mikilvægur liður í aukinni dreifingu ferðamanna um landið að vetri jafnt sem sumri.
Í samningnum segir m.a. að á árinu 2016 muni Samtök um söguferðaþjónustu leggja áherslu á eftirfarandi verkefni sem m.a. teljast til forgangsmála í verkefnaáætlun Vegvísis í ferðaþjónustu:
Samningur Samtaka um söguferðaþjónustu og Íslandsstofu
Íslandsstofa og Samtök um söguferðaþjónustu hafa skrifað undir samning um samstarfsverkefni á sviði söguferðaþjónustu. Samningurinn hefur þann tilgang að nýta þá samlegð sem verður til í störfum Íslandsstofu og Samtaka um söguferðaþjónustu og ná þannig betri árangri af verkefnum. Starfsmaður verkefnisins er Katarzyna Dygul. Hún hefur áður starfað hjá alþjóða ráðgjafafyrirtækinu Tendensor í Svíþjóð sem sérhæfir sig í mörkun áfangastaða ásamt því að starfa m.a. hjá Baltic Development Forum og Iceland Unlimited. Samstarfsverkefnið er tímabundið í 3 mánuði og mun starfsmaður samtakanna starfa á sviði ferðaþjónustu og skapandi greina.
Rögnvaldur Guðmundsson, formaður samtakanna og Jón Ásbergsson, framkvæmdastjóri Íslandsstofu skrifuðu undir samninginn sem tekur gildi 1. apríl.
Ágætu félagar í SSF og sérstaklega þeir sem vinna með söguna fyrir árið 1300!
Boðað er til fundar um Follow the Vikings verkefnið sem hófst á síðasta ári og stendur til 2019.
Í verkefninu eru m.a. haldnar ráðstefnur með mismundandi þemum tvisvar á ári. Næsta ráðstefna verður haldin í Catoria á Spáni 25.-26. maí 2016 og síðan í Trelleborg i Danmörku í lok september.
Við hjá SSF munum síðan bjóða ráðstefnu í verkefninu í september á næsta ári (2017).
Fyrstu ráðstefunni er lokið og var hún haldin í Foteviken rétt sunnan við Malmö í Svíþjóð og þar tóku um 100 manns þátt. Því er um að ræða frábært tækifæri til lærdóms og tengslamyndunar við aðila víðsvegar í Evrópu sem eru að þróa ferðaþjónustu er byggir á víkingatímanum.
Óskum eftir að fá til fundarins 11. mars sem flesta þá félaga í SSF sem eru að vinna með víkinga- og/eða söguritunartímann (þ.e. fram til 1300)
Stjórn SSF hefur ákveðið að styrkja allt að fjóra félaga í SSF um 500 Evrur til að fara á hverja af þessum ráðstefnum. Gert er ráð fyrir að tveir af þeim haldi erindi á viðkomandi ráðstefnu.
Með fundinum viljum við kanna áhuga félagsmanna til þátttöku í Follow the Vikings ráðstefnunum og jafnframt ræða hvernig verkefnið getur sem best stutt við bakið á ykkar starfi.
Vonumst til að sjá sem flesta sem eru að vinna með þetta tímabil sögunnar.
Stjórn SSF
Vinsamlegast tilkynnið þátttöku ykkar í fundinum í Víkinni í mars á netfangið asborg@ismennt.is
ATH.
Stefnt er að því að halda aðalfund og söguslóðaþing SSF í Reykjavík 29. apríl 2016. Takið daginn frá !
Ágætu félagar!
Næsti félagsfundur verður haldinn í Vestmannaeyjum dagana 15.-16. okt. Gert er ráð fyrir að félagar taki Herjólf frá Landeyjahöfn á fimmtudeginum kl. 09:45 og
til baka frá Vestmannaeyjum á föstudag kl. 13.30. (mæting 30 mín. fyrir brottför)
(Þeir sem ná ekki Herjólfi fyrr en kl. 12.30 á fimmtudegi munu þó ná í hádegisverðinn.
Tilboð á gistingu frá Hótel Vestmannaeyjum
Eins manns herbergi með baði kr. 12.700
Tveggja manna herbergi með baði kr. 15.900, morgunverðarhlaðborð innifalið.
Aukanótt kr. 9.000.- á herbergi (bæði eins og tveggja manna.)
Hvetjum alla til að versla sér aukanótt, taka makann með eða bara hvern sem er, og vera í Eyjum fram á laugardag!
Þátttakendur bóka sjálfir gistinguna á hótelinu á hotelvestmannaeyjar@simnet.is eða í síma 481-2900 (Maggi eða Adda)
Hátíðarkvöldverður í Eldheimum á 6.900 kr.
Hádegisverðir á 2.000-2.500 kr í hvort sinn.
Skráning á fundinn er hjá Ásborgu Arnþórsdóttur á asborg@ismennt.is eða í s. 898 1957
Á dagskrá er m.a. kynning og umræða um þátttöku SSF í stóru Evrópuverkefni sem nú er að hefjast, Follow the Vikings og hægt er að fræðast frekar um hér á síðunni.
DRÖG AÐ DAGSKRÁ er að finna hér en nákvæm dagskrá verður sent inn í næstu viku.
Vonumst til að sjá sem flesta!
Stjórn Samtaka um söguferðaþjónustu
Ágætu félagar í Samtökum um söguferðaþjónustu. Á næstunni verður gamli vefurinn okkar tekinn úr sambandi og nýr vefur fyrir ferðamanninn ræstur á slóðunum http://www.soguslodir.is og http://www.sagatrail.is. Sá vefur er sniðinn fyrir ytri markaðssetningu á aðilum að samtökunum. En við félagarnir verðum líka að eiga okkur samastað. Við getum notað Facebook-síðu samtakanna til að kynna viðburði hvert fyrir öðru og íslenskum almenningi en fyrir innra starfið er nauðsynlegt að eiga óðal í einföldum vef. Og hér verður hann byggður upp á næstu vikum. Markmiðið er að hér verði að finna það helsta sem miðla þarf milli félagsmanna, fundargerðir, fyrirlestra, skýrslur, stefnur, ljósmyndir og jafnvel upptökur af málþingum. Þá gefst mönnum líka kostur á að kommenta eða koma með fyrirspurnir. Það er von okkar í stjórn að vefurinn eigi eftir að koma að góðum notum en það fer auðvitað eftir því hver virk við verðum öll í að setja inn á hann efni.
Með kveðju frá stjórn SSF
Skúli Björn