apríl 2016 – Samtök um söguferðaþjónustu

Afmælismálþing og aðalfundur 29. apríl

21. apríl, 2016

Boðað er til aðalfundar Samtaka um söguferðaþjónustu í Norræna húsinu föstudaginn 29. apríl kl. 10. Á dagskrá eru hefðbundin aðalfundarstörf en fundarboð er hægt að sjá hér og þar er einnig að finna ársreikning 2015.

Eftir hádegi kl. 13 hefst síðan söguslóðaþing undir yfirskriftinni Tækifæri söguferðaþjónustunnar. Íslandsstofa og Norræna húsið er samstarfsaðilar samtakanna vegna þingsins og á því verða flutt mörg spennandi erindi. Meðal fyrirlesarar eru m.a. Andri Snær Magnason og Guðni Th. Jóhannesson. Þetta er níunda söguslóðaþingið sem samtökin standa fyrir og er sérstaklega veglegt í þetta sinn í tilefni tíu ára afmælis samtaknna í vor. Söguslóðaþingið er öllum opið en gott að menn skrái sig á islandsstofa@islandsstofa.is.

Söguslóðaþing 29. apríl

8. apríl, 2016

Árvisst Söguslóðaþing Samtaka um söguferðaþjónustu verður haldið í Norræna Húsinu í Reykjavík föstudaginn 29. apríl. kl. 13-16:00. Missið ekki af áhugaverðum viðburði á 10 ára afmæli samtakanna. Aðalfundur samtakanna verður haldinn að morgni sama dags. Fundarboð verður sent út í næstu viku ásamt dagskrá Söguslóðaþings.

Starfsmaður samtakanna

8. apríl, 2016

Katarzyna Dygul starfsmaður Samtaka um söguferðaþjónustu er mætt til starfa og við bjóðum hana innilega velkomna. Hún verður með starfsaðstöðu hjá Íslandsstofu og við væntum mikils af því samstarfi og gleðjumst yfir þeim áfanga að vera loksins komin með starfsmann. Katarzyna mun verða í sambandi við félagsmenn á næstu vikum en hún vinnur að verkefnum sem stjórn hefur sett í forgang. Nánar um það síðar.

Endurnýjaður samningur við iðnaðarráðherra

2. apríl, 2016

Ragnheiður Elín Árnadóttir iðnaðar- og viðskiptaráðherra og Rögnvaldur Guðmundsson formaður Samtaka um söguferðaþjónustu (SSF) skrifuðu 25. febrúar undir samning um eflingu söguferðaþjónustu á Íslandi. Markmið samningsins er að vinna að frekari uppbyggingu og þróun söguferðaþjónustu um land allt þar sem leitast verður við að auka upplifun ferðamanna og afþreyingu sem byggir á menningararfi.

Áhersla er lögð á að byggja upp ferðaþjónustu sem lýtur að miðlun menningararfs og kynningu á sögu þjóðarinnar. Kannanir sýna að áhugi ferðamanna beinist í auknum mæli að þessum þætti sem getur orðið mikilvægur liður í aukinni dreifingu ferðamanna um landið að vetri jafnt sem sumri.

Í samningnum segir m.a. að á árinu 2016 muni Samtök um söguferðaþjónustu leggja áherslu á eftirfarandi verkefni sem m.a. teljast til forgangsmála í verkefnaáætlun Vegvísis í ferðaþjónustu:

koma að gerð stefnumótandi stjórnunaráætlana fyrir ferðaþjónustuna í hverjum landshluta
taka þátt í mörkun Íslands sem áfangastaðar með tilliti til menningararfs og sögu
vinna að nýsköpun og vöruþróun í söguferðaþjónustu með sérstaka áherslu á „að gera söguna lifandi“ og auka upplifun ferðamanna
stuðla að samvinnu við ferðaskrifstofur og ferðaskipuleggjendur um þróun söguferða og söguhringja
efla markaðssetningu á söguferðaþjónustu innan lands sem utan
vinna að fjölgun virkra aðila samtakanna

Samningur SSF og Íslandsstofu um starfsmann

2. apríl, 2016

Samningur Samtaka um söguferðaþjónustu og Íslandsstofu

Íslandsstofa og Samtök um söguferðaþjónustu hafa skrifað undir samning um samstarfsverkefni á sviði söguferðaþjónustu. Samningurinn hefur þann tilgang að nýta þá samlegð sem verður til í störfum Íslandsstofu og Samtaka um söguferðaþjónustu og ná þannig betri árangri af verkefnum. Starfsmaður verkefnisins er Katarzyna Dygul. Hún hefur áður starfað hjá alþjóða ráðgjafafyrirtækinu Tendensor í Svíþjóð sem sérhæfir sig í mörkun áfangastaða ásamt því að starfa m.a. hjá Baltic Development Forum og Iceland Unlimited. Samstarfsverkefnið er tímabundið í 3 mánuði og mun starfsmaður samtakanna starfa á sviði ferðaþjónustu og skapandi greina.

Rögnvaldur Guðmundsson, formaður samtakanna og Jón Ásbergsson, framkvæmdastjóri Íslandsstofu skrifuðu undir samninginn sem tekur gildi 1. apríl.